KATO-KATO PENGULUR (Yang Datang dari Pihak Nan Jantan) SESUAI DENGAN ADAT KABUPATEN BUNGO.

 

 KATO-KATO PENGULUR (Yang Datang dari Pihak Nan Jantan)

Sebelum admin berbicara dan menulis terlalu jauh, disini admin mengucapkan permohonan maaf apabila didalam tulisan admin nantinya terdapat kesalahan dan kekeliruan didalam pengucapatan dan penulisan kata demi kata didalam Pembahasan Kato-kato Pengulur didalam Prosesi Resepsi Pernikahan Sesuai dengan Adat nan Ta Ico nan Tapakai di Dalam Kabupaten Bungo, Provinsi Jambi. Adapun Kato-kato Pengulur (yang datang dari Pihak nan Jantan) adolah sebagai berikut:

Assalammu’alaikum Warahmatullahi Wabarakatuh.

Pertama-tama marilah kita panjat kan puji serta syukur kehadiran allah Subhanahu Wa Ta’ala, yang mana atas rahmat dan ridhonya pado hari nan iluk ketiko yang baik ko kito sekalian dapat bertemu didalam acara ko.

Ninek mamak suku nan sebelah kampung nan sebagi, tuo tangganai, cerdik pandai, alim ulamo, serto segalo kito nan hadir kini ko, kecik benamo, gedang begela, kecik idak disebut namonyo gedang idak pulo dipanggil gelanyo.

Kedatangan kami pado hari ko beserto dengan arak dengan iring nyo, dilepeh oleh serai nan berumpun, ayam nan berinduk, kerumah iko hendak menepati janji semanyo ikek buek kito, serah  terimo, dan ulur antar penganten.

Ninek mamak yang kami mulyokan, sebagi mano lah samo-samo kito ketahui bahwa adat bersendi syara’, syara’ bersendi Kitabullah, adat nan selingkung negeri, syara’ nan selingkung alam, adat nan setepak, lembago nan setuang, nan dikatokan induk undang tambang teliti, induk undang tambang lembago, mano nian tambang pusako yaitu yang kito pusako’i turun temurun.

Mano waris nan samo kito jawat, pusako nan samo kito terimo, khalifah nan kito junjung, khalifah di junjung dari Nabi, waris dijawat dari nan tuo, manolah waris nan dijawat dari nan tuo, yaitu mengenai perkaro utang kepado anak adolah:

So turun mandi, Keduo Sunat Rasul, ketigo Menganta anak pegi mangaji, dan perkaro nan keempat iolah mengantar anak kerumah tanggonyo. Jadi dalam acara kito pado hari iko, iolah membayar utang kepado anak perkaro nan ke empat, menurut pepatah adat Kok hidup diantar kerumah tanggonyo, ko mati di anta ketanah Layu.

Kami pado hari iko iolah menganta anak kerumah tanggonyo, ruponyo disiko untung nyo nan maimbau, mako dari itu disiko kami anggap parit nan basudut, aur nan berumpun, yo kasiko anak kami ulu, kami serahkan. Kami ulu dengan hati nan suci muko nan jernih, kami ulu kebawah payung nan sekaki kembang, kami serahkan kebawah mahligai sebatang tegak.

Ninek mamak serto hadirin yang kami mulyokan.......................

Tapi kini pedih-pedih hati kami tekan, malu-malu muko kami usapkan. Kareno kami idak dapat menyerahkan anak buah anak kepenakan kami ko dengan emeh nan betail, perak nan betajau, karno kami ikuk meranting kepak meranggeh, bukit lengeh pematang kering, lalang idak capo dak tumbuh, tumbuh sebatang lah layu pulo. Maklumlah kami hidup dek hari nan begaji, gedang idak dek upah nan bejangko.

Tebang tebeh beluka mudo, Pemalun Tegak berdiri,..

Idak Ber emeh diserahkan jugo, silih menyerah hino diri.....

Kini, kami serahkan anak Kepenakan kami ko dengan Punggung nan idak betutup, kepalo nan idak betudung, kami serahkan dengan keris pendek nan bengkok, keris panjang nan belimbai, dimano letak dimano iluk, asal dalam pegang pakai. Tacacak boleh dijadikan unja, telintang boleh dijadikan pengepit, ta untai boleh dijadikan tali, penjemput nan jauh, penating nan berat, jadi biduk sampan pelayangan, menjadi kudo pelejang bukit, bukit serigi buang-buangan.

Ninek mamak Suku nan sebelah Kampung nan sebagi serto hadirin yang kami mulyokan........................

Penyerahan kami iko bukanlah serah dengan serah patah arang, tapi kami menyerahkan dengan serah patah umbut, kareno kami ingin bekampuh tu yo ndak leba, be uleh tu yo ndak panjang, sungguh pun putus masih ado suto halus nan saling jalin menjalin. Siapo tahu kito hidup idak muju sepanjang waktu, kok malang nan sekejap mato, kok tumbuh anak buah anak kepenakan kito ko di kemudian hari, kok bejalan nyo lah melintang tapak, bekato nyo lah menentang bena, kecak betih bak betih, kecak lengan bak lengan, gedang kalaso ndak menindih, runcing tanduknyo ndak menggewang idak dapat dipepatkan, iolah alih kan kepado kami serai nan berumpun ayam nan berinduk, kami besedio menjadi apa besa tempat betitik, gedung bicaro tempat balik, bulih kami tetah aja,tegur sapo anak buah anak kepenakan kito ko, sehinggo runcing tanduk samo-samo kito pepat, gedang kelaso samo-samo kito pampeh.

Ninek mamak suku nan sebelah kampung nan sebagi serto hadirin yang kami mulyokan....

Akhirnyo kami menyadari pulo, bahwa dalam kato-kato penyerahan kami iko sekironyo terdapat kekurangan serto tutu kato nan idak pado tempatnyo, dengan segalo kerendahan hati kami unjukan lutut nan duo, kami susun jari nan sepuluh, kami tunduk kan kepalo nan satu, mohon di maafkan.

Kini, ninek mamak suku nan sebelah kampung nan sebagi sertao hadirin yan kami mulyokan, serah padi di jerami, penadah kami limpahkan. Ninek mamak terimolah kini anak kepenakan kami serahkan.

 

Wassalammu’alaikum Warahmatullahi Wabarakatuh.

 

 

Sumber: Tata Cara Perkawinan Menurut Adat Bungo